هب السعد ..

بقلم : عدنان الشرهان

جاسم بالصالة مشغول في ترتيب الزرع الداخلي .. تقف حصه في منتصف الصالة واضح عليها الحزن من شيء ما !!

حصه : صباح الخير ..

جاسم : صباح النور .. شفيج !!!؟

حصه : حاسة ” بغمته ” يا جاسم .. زهقت من قعدة البيت ..

جاسم : انتي من يوم ما منعتج تروحين ( ملجة ) بنت اختج وانتي مبوزه !!!! يا بنت الناس ترى الكورونا منتشرة بقوه هالأيام بالكويت والموضوع مو لعب .. ركدوا ركدوا .. وإنثبروا ببيوتكم لاحقين على” الهيله ” ترى كلها اشهر والله يفرجها علينا ..

حصه ( ماده البوز ) : يعني بذمتك مو فشله لما بوفهد زوج اختي يكلمك بنفسه وتقول له راح تحضر ( الملجه ) واخر شي تطنشهم وما تروح !!!!؟ والله فشله !!

جاسم ( يرفع حواجبه ) : يعني هذا همج الحين !!!! فشله لأني مارحت الملجه !!!! مو همج يعني فيني مليون مرض والطلعة خطر على صحتي !!!!؟

حصه : يا جاسم يا جاسم آنا والله مكتئبه وقلبي ( منغمت ) وانت بعد الله يهديك لا حطيت لنا شاليه ولا مزرعة نوسع صدرنا فيها حالنا حال هالعالم !!!!

يرن موبايل حصه : الوه .. شنو !!!؟ شنو !!؟

حصه تسقط على” القنفه ” منهاره .. جاسم يشيل الموبايل : الوه .. شنو ؟ بوفهد !!!! الله يرحمه برحمته .. لا حول ولا قوة إلا بالله .. كورونا .. أوووووف حتى المعرس والعروس !!!! الله يشافيهم .. وين !!؟ مستشفى جابر !! لا حول ولا قوة إلا بالله .. إنتهى